বাংলাদেশর বিষ্ণুপ্রিয়া মণিপুরী সাহিত্যর ইতিহাস বিছারিয়া চেইলে আমি দেহিয়ারতা ব্রিটিশ আমলেত্ত দেশএহাত বিষ্ণুপ্রিয়া মণিপুরী ঠারলো সাহিত্যচর্চা চলিয়া আহের। ১৯২৫ সালে শ্রীহট্ট টাউনেত্ত শ্রীমহেন্দ্রকুমার সিংহ গিরকর সম্পাদিত “জাগরন” পত্রিকা বাংলাদেশর বিষ্ণুপ্রিয়া মণিপুরীর পয়লা মুখপত্রহান। শ্রীফাল্গুনী সিংহ সম্পাদিত “মেখলী”, শ্রী সমরজিৎ সিংহ সম্পাদিত “মণিপুরী” পত্রিকা বারো পিসেদে প্রকাশিত “বিষ্ণুপ্রিয়া” পত্রিকা এতা দেশএহার মানুরে সাহিত্যচর্চাৎ উৎসাহ দেসে। সময়অহার পত্রপত্রিকাৎ ঐতিহাসিক তথ্যসম্বলিত প্রবস্ধ, কবিতা বারো সমাজর নানান পৌ ফাম পাসে। বিশেষত দেশর কোনা কোনসেলে বিভিন্ন জাগাৎ অনুস্ঠিত সভা সমিতির পৌ প্রাধান্য পাসে।
সময়অহান সাহিত্যর লাতলে নিয়মহান করিয়া লিখলা কবি সাহিত্যিকরমা শ্রীগোবর্ধ্ধন সিংহ, শ্রীজগৎচন্দ্র সিংহ, শ্রীবলরাম সিংহ, শ্রীগোকুলানন্দ গীতিস্বামী, শ্রীদীননাথ সিংহ, শ্রী ললিতমোহন সিংহ গিরকগাছির নাঙ লনা য়াকরের। মানুর থতাৎতো থতাৎ বুলিয়া আসিল লোকসাহিত্য, এলা, মাতৃবন্দনা, মণিপুরর য়ারি ইত্যাদি সাহিত্যর লাতল ঙালয়া আসিল। গোকুলানন্দ গীতিস্বামী গিরকর সমাজ জাগরণী এলা, কবিতা, বাসক হাবি বিষ্ণুপ্রিয়া মণিপুরী সাহিত্যর অমুল্য সম্পদ। কবিতার বেদে ডালুয়র শ্রীযাদব সিংহ , ভানুবিলর শ্রীনবদ্বীপ সিংহ গিরকৌ নাঙপালসিলা বৃটিশ আমলে।